ഇന്ന് നിശബ്ദ പ്രചാരണം; കേരളം വിധിയെഴുതാൻ ഇനി മണിക്കൂറുകൾ മാത്രം

പതിനഞ്ചാമത് കേരള നിയമസഭയിലേക്കുള്ള തെരഞ്ഞെടുപ്പ് നാളെ നടക്കും. ഞായറാഴ്ച വൈകീട്ട് പരസ്യപ്രാചരണം അവസാനിച്ചതോടെ ഇനി നിശബ്ദ പ്രചാരണത്തിന്‍റെ സമയമാണ്. സംസ്ഥാനത്തെ 140 നിയമസഭാ മണ്ഡലങ്ങളിലേക്കും മലപ്പുറം ലോക്‌സഭാ മണ്ഡലത്തിലേക്കുമുള്ള വിധിയെഴുത്താണ് ചൊവ്വാഴ്ച രാവിലെ ഏഴിന് ആരംഭിക്കുക.

131 മണ്ഡലങ്ങളിൽ രാവിലെ എഴ് മുതൽ വൈകീട്ട് ഏഴുവരെയും ഒൻപത് നിയമസഭാ മണ്ഡലങ്ങളിൽ വൈകീട്ട് ആറുവരെയുമാണ് വോട്ടെടുപ്പ്. മാവോയിസ്റ്റ് ഭീഷണിയുള്ള പാലക്കാട്, മലപ്പുറം ജില്ലകളിലെ ഒൻപതു മണ്ഡലങ്ങളിലാണ് വൈകീട്ട് ആറുവരെ പോളിംഗ് നിശ്ചയിച്ചിരിക്കുന്നത്. മാനന്തവാടി, സുൽത്താൻബത്തേരി, കൽപ്പറ്റ, ഏറനാട്, നിലമ്പൂർ, വണ്ടൂർ, കൊങ്ങാട്, മണ്ണാർക്കാട്, മലമ്പുഴ എന്നിവിടങ്ങളിലാണ് ഇത്.957 സ്ഥാനാർഥികളാണ് നിയമസഭാ തെരഞ്ഞെടുപ്പിൽ മത്സര രംഗത്തുള്ളത്. മലപ്പുറം ലോക് സഭാ മണ്ഡലത്തിലേക്കുള്ള ഉപതിരഞ്ഞെടുപ്പിൽ ആറ് സ്ഥാനാർഥികളും മത്സരിക്കുന്നു. 13283727 പുരുഷന്മാരും 14162025 സ്ത്രീകളും 290 ട്രാൻസ്‌ജെൻഡേഴ്‌സും ഉൾപ്പെടെ 27446039 വോട്ടർമാരാണുള്ളത്. ഇതിൽ 518520 പേർ കന്നി വോട്ടർമാരുമാണ്.

രണ്ടു കോടി എഴുപത്തിനാല് ലക്ഷം വോട്ടർമാരാണ് നാളെ ബൂത്തുകളിൽ എത്തുക. കൊവിഡ് മാനദണ്ഡങ്ങള്‍ പാലിച്ചാണ് പോളിംഗ് ബൂത്തുകള്‍ സജ്ജമാക്കുന്നത്. ഒരു ബൂത്തില്‍ പരമാവധി 1000 പേര്‍ക്ക് മാത്രമാണ് വോട്ടിങ് സൗകര്യം ഏർപ്പെടുത്തുന്നത്. ഈ സാഹചര്യത്തിൽ ഇത്തവണ ബൂത്തുകളുടെ എണ്ണവും കൂട്ടിയിട്ടുണ്ട്. 40771 പോളിങ്‌ ബൂത്തുകളാണ് സംസ്ഥാനത്ത് സജ്ജീകരിച്ചിട്ടുള്ളത്.

എല്ലാ ബൂത്തുകളിലും അവസാനത്തെ ഒരു മണിക്കൂർ കൊവിഡ് ബാധിതർക്കും, ക്വാറന്‍റൈനിൽ കഴിയുന്നവർക്കും പിപിഇ കിറ്റ് ധരിച്ചെത്തി വോട്ട് ചെയ്യാം. കേരളത്തിനൊപ്പം തന്നെ തമിഴ്നാട്ടിലെയും പുതുച്ചേരിയിലെയും ജനങ്ങൾ വിധിയെഴുതുന്നതും നാളെയാണ്. ബംഗാളിലും അസമിലും മൂന്നാംഘട്ട വോട്ടെടുപ്പും നാളെ നടക്കും.

Leave a Reply

Your email address will not be published. Required fields are marked *

Share via
Copy link
Powered by Social Snap